News

E Bydraag als Ystimmig uff d Fasnacht in Zytte von ere Epidemie.

Corona-Virus!
Panik!
Hüüser, jä ganzi Stedt wäärde zuegmacht, Veraastaltigen abgsait.
Aber bekanntlig gitts jo nüt Neus under der Sunne.
Gnau voor 100 Joor, im 1920, isch das nämmlig au scho bassiert.

Die grossi Epidemie vo 1920

Noon em 1. Wältgrieg und der abgsaite Fasnacht vo 1919 hänn d Fasnächtler druff blanggt, ändlig wiider emool könne uff d Strooss z goo.
Aber doo isch e Gribbe-Wälle durs Land zooge und d Basler Regierig hett als Voorsichtsmassnaam d Fasnacht abgsait.
Abgsait?
Nai, doo hett sy d Rächnig ooni d Fasnächtler gmacht. Die hänn sich das noo der uusgfallene Fasnacht vom Joor voorhäär nümm welle lo biete loo.

Frieligsfasnacht ohni Klimaerweermig

S hett grumoort in der Stadt. Schliesslig hett au d Regierig en Yysee ghaa. Sy hett bschlosse, d Fasnacht duurezfiere, sobald die Epidemie abgflaut isch.
Und esoo isch es koo, ass d Fasnächtler 1920 vom 22. bis 24. Merze, vier Wuche noon em aigedligge Fasnachtsdatum, doch no zue iirem Fescht koo sinn.
E aigedligi Frieligsfasnacht, ganz ooni Klimaerweermig.

Stainlemer 1920: Stoorchemisère

Uus däm Joor stammt au die erschti Staine-Ladäärne, wo sich (wenigschtens mit der Vordersytte) bis hütte erhalte hett.
S Sujet “Storchemisère“ hett uff d Gummirationierig aagspiilt, wo bi Nuggi und Pariser zue Ängpäss gfiert hett…