News |
zur Übersicht |
 |
|
Wie d Stainlemer gründet worde sin. In däm elände Joor 2020 fallt also au unsere Stainegeburdsdag flach, e Fescht, wo übrigens erscht 1937 zem 25 Joor-Jubiläum s erscht Mool gfyrt worden isch. Will mer also unsere 108. Geburdsdag nit zämme könne fyre, hämmer e bitz Zyt, zem ys z froge: - Wie isch das aigedlig im 1912 gnau gsi? Und: - Wo hett das Ganze stattgfunde? Das will ych doo kurz verzelle. E baar Fründ uus der Staine sinn an der Fasnacht 1912 spontan mit eme Züügli am Cortège gloffe. Will ene das esoo guet gfalle hett, hänn sy beschlosse, sich au in Zuekumpft z dräffe. Zue däm Zwägg hänn sy d “Donnschdigs-Gsellschaft“ (DG) wiider uffläbe loo, wo sy 1908 gründet, aber spöter wiider uffgää hänn. Jetzen isch die DG aber e Gselligkaits-Verain und kai Fasnachtsglygge gsi. Drum hett me an ere Sitzig im Novämber 1912 beschlosse, an der näggschte Zämmekumpft näbe der DG au non e Glygge z gründe, wo au nit DG-Mitgliider könnte mitmache. Der Räscht isch Gschicht. Doo der entschaidend Uuszuug uus em Protokoll (y hoff, iir könneds lääse):  Der Preesi isch übrigens der dritt vo de Winkler-Brieder gsii, der Ruedi. Är hett sich spööter au seer für d Gründig vo de Junge Stainlemer ygsetzt und isch 1926 iiren erschte Obmaa woorde. Aber wo hett dä legendär Gründigsakt denn stattgfunde? Luege mer doch emol der Aafang vo däm Protokoll aa:  Mit 8 Mitgliider isch dä Aaloss fascht esoo guet bsuecht gsii wie als unseri GV oder Fasnachtssitzig… Und spannend isch au, ass bi der Abstimmig über der Glyggenamme die 8 Mitgliider + 1 Neuuffnaam 10 Stimmen abgää hänn… E Glyggekäller hänn d Stainlemer sälbetsmool nodüürlig noonig ghaa, also hänn sy in e Baiz uuswyyche miesse. Vo däne hetts au döörte scho seer vyl in der Staine ghaa. Aber wo isch denn das kaibe Rest. Pichonnaz gsii? E Bligg in s Adrässbuech vo sällere Zyt hilft ys doo wytter:  D Baiz isch also nit in, nai sy isch vor der Staine glääge! Und eso hett s Rest. Oberwilerhalle uusgsee, wo der Louis Pichonnaz übrigens zwüsche 1905 und 1915 druff gwirtet hett:  Hütt seets dörten eso uus (s “Allianz“-Huus stoot an der Stell vo der Oberwilerhalle):  Intressant isch aber au no, weeles Bier unseri Gründigsvätter an sällem Oobe gsürpflet hänn (falls sy sich nit an Wy ghebbt hänn, was zue sällere Zyt ender üblig gsi isch). Der Louis Pichonnaz hett nämmlig in synere Baiz Bier vo der Oberwiler Brauerei “Waldschlössli“ uusgschänggt. Dä Bedrib isch 1915 ändgültig schnurpf gange und villicht gitts doo e Zämmehang mit em Abgang vom Louis Pichonnaz im glyche Joor. S Spannend do dra isch jetze, ass es die Brauerei syt 2015 wiider gitt! Das wäär doch in der Zyt noo däm Corona-Saich emol e Summerbümmeli wärt! Doo noon e baar Link zem Thema: https://www.waldschlössli.ch https://www.waldschlössli.ch/geschichte/ https://www.altoberwil.ch/brauerei-waldschloessli/
|
|
| Autor: Christian Zingg | |
Bild 1 / 5
Bild 1 / 5
Bild 1 / 5
Bild 1 / 5
Bild 1 / 5
|
|
|
|
| Dominik Baier - 23.12.2020 08:54 | |
| Y wär bi soneme Bümmeli nach Oberwil derby und könnt dr Kontakt zum Pascal Ryf au organisiere. | |
Kommentare (1)Neuer Kommentar
Realisation: apload GmbH - Design: A. Stulz