News

Mir druure um unsere Eerepreesi Fille Lehr (1931–2021)

Schwyzer Mäischter us em Neubad

Uffgwaggse isch der Felix Lehr an der Wanderstross im Grossbasel. Drummle glert het er bi den Alte Stainlemer, und wie! Er hett nit nummen in den Intärne butzt, nai am Aidgnössische Damburefescht 1950 z Bärn hett er in däre Dreiergrubbe mitgruesst, wo gwunne het und dermit Schwyzer Maischter worden isch. Vier Joor spöter z Basel hetts dernoo noon e Silbermedallie gä.

D Liebi füert ins Glaibasel

Im Umkrais vo den Alte Stainlemer hett der Fille au d Alice “Hummi” von Arx kennen und liebe gleert, die hübschi Dochter vom ehemolige Stainepresidänt Ruedi von Arx. Der Ruedi het im ene schöne Hus an der Schwarzwaldallee gwoont. Das Hus isch dernoo für Joorzäänt s Domizil vo der Familie Lehr-von Arx worde.

Us dr Clique-Finanzkrise use

Doch zrugg zue den Alte Stainlemer. Die hän bald gsee, wie dä jung Fille für d Fasnacht und d Glygge brennt. So isch er beraits 1955 zem 2. Aktuar, spöter zem Vizepresidänt gwäält worde. Sy grossi Zyt isch aber mit der Waal zem Presidänt 1962 koo. D Glygge isch sällmol noon em 50 Joor-Jubiläum, wo grossartig gfyrt worden isch, finanziell uff em Rumpf gsi. Under der Laitig vom Fille isch sy zue neuem Glanz koo. Am Änd vo synere 14-jöörigen Amtszyt, hänn d Stainlemer e Vermööge in säggsstelliger Höchi gha.

Em Fille sy Vermächtnis

Die gröschti Laischtig vom Fille, jä sy aigedlig Vermächtnis, isch aber der Glyggekäller am Aubärg. Wos Staineschuelhus 1968 abgrisse worden isch, zem em neue Theater Blatz z mache, hänn die Alte Stainlemer iire gmietlig Käller und d Iebigsrüm in de Schuelzimmer verlore.
Zer glyche Zyt isch grad s Heuwoog-Viadukt mit em Staine-Parking und ere Zivilschutzaalag baut worde. Do het der Fille alli Hebel in Bewegig gsetzt, ass d Stainlemer e Dail vo däre Schutzunterkumft für iir neu Glyggelokal hänn könne miete.
Bi unzäälige (nota bene uus em aigene Sagg zaalte) Nachtässe hett er vom Regierigsrot bis zem Zivilschutzchef alli wichtige Persone ”bearbaitet”.
Mit Erfolg, denn syt gnau 50 Joor hänn die Alte Stainlemer iir schön Glyggelokal am Aubärg: ”Hie Staineboode“!
Die bäide Bilder zäige dr Fille bi de bäide Eröffnigsaläss vom Stainekäller am 29.10.1971 (mit dr symbolische Eröffnigsschär) und bim "Dîner Dansant" am 20.11.1971.

Dr legendäri Säbel vom Fille

“Hie Staineboode“, het der Fille am ene Fasnachtsdonnschdig au emol in der Merkurstube gruefe und sy (ächte!) Säbel, wo er sälbetsmol zem Sujet bassend derby gha het, in Parkettbode vo der Baiz grammt.
Das hätt er lieber nit gmacht. S Rösli Schneider, die legendäri und resoluti Wirtene, het en mit der Bemerggig “Hie ischt myn Bode“ unsamft an die früschi Luft spediert. Am näggschten Obe isch der Fille mit eme grosse Maie in d Baiz gschliche und het - uff de Gneu! – um Vergäbig bätte. Är het öbbe gnau gwüsst, wien är mit sym Charisma und Charme d Mensche für sich gwünne ka.

Dankbarkeit und Truur

Mit em Fille Lehr verliere die Alte Stainlemer nit nummen iiren Eerepresidänt, sy verliere au e prägendi Figur, e Stainlemer ”de pur sang”, e ganz e grossi Figur vo der Glyggegschicht. Unser härzlig und dief Bylaid spräche mir synere Frau, der Hummi, syne baide Kinder, em Andy und der Jaqueline, und alle syne Aghörigen uus.

Kommentare (0)