News

D Fotteli kasch do in voller Ufflösig aaluege => Bummel 2022 

 Und do isch der Bricht vom Winti:

Y fang a mit em Bummelbricht für alli U18, as sy nid so lang mien lääse. Als Pädagoog wurd y empfääle z portioniere und am Schluss e glaini Zämmefassig z schryybe. «Alte, was hän dr Bummel gmacht?» - «Zic-Zac, weisch.» - «Isch cool gsi?» - «Jo!»

Es isch kei Sunntig gsi, wo me s Schätzli hätt sotte zum Brunchen ussfiere. D Staine het sich no Schwellheim uffgmacht und dr Bummel in Aagriff z nä. S Buffet het so ussgseh, as es knapp wurd länge für e Bud Spencer und e Terrence Hill, also gnueg für alli. Früsche Schnittlauch hets keine gha, was my masslos enttüscht und immer no hässig macht, aber sunscht isch alles dört gsi, was uns d Natur und Tierwält an Naarig liifered. Y weiss nid, ob men in gmischte Clique ka Cordon bleu zum Zmorge ha. Bi uns goot das und dasch guet so! 

D Fred het denn mit synen ehemolige Schuelkamerädli d Bühni gstürmt und Beatles-Klassiker zum Beschte gä. Wieso die drei vornen alli mit em Cyrill am Schlagzüüg in d Schuel sinn, weiss y nid, aber s Musig mache, muess me däne nid erklääre. Bi «Hey Jude» ischs denn wider sowyt gsi und mr hänn unseri Stimmorgan können yysetze. Artig wie mr sinn, hänn mr se jo bereits intensiv göölt. Die aawäsende Gugge-Kevins sinn beyydruggt gsi ab unsere Sousaphon-Qualitäte. 

Die neggscht Station isch dr Käslade an dr Comarerstrooss gsi. Dasch dä, won ys letscht Joor e Fonduemischig für e Bummel parat gmacht het. E glatte Käs-Sommelier het ys alles über sini Usswahl verzellt. Lutter Käs, wo dä verzapft het, unglaublig. Gschmeggt hets trotzdäm herrlig! So guet, as sogar dr Hansruedi Ibach und d Myrta schnäll verby ko sinn. 

Die ander Helfti isch wytter zum Bierjohann. Im schöne Gärtli sinn ys dört fünf lecker Bierchen kredänzt worde. Also sage mr vier. S letschte het villi farb- und gschmagglig nid so überzügt. Suurkrutt schmeggt kocht au besser, find y. 

Uff die 16:00 isch denn bi dr Harmonie dr Dräffpunggt gsi. Mr hänn ys alli wider versammled und d Buebe mitgno, wo am Morgen em Schifffahrtsmuseum e Bsuech abgstattet und denn mit dr Fääri übergsetzt hänn. Schyns alli Junge vornen am Bug und dr Kränger hinden im Hegg. E nautischi Meischterleischtig! 

D Spiilfreud isch ys nach däre tolle Fasnacht nid abhande ko. S het zünftig brättered und melodiert. As mr e Stund länger hänn miesse/dörfe/könne schaffe, het e keine gstöört. Schad isch eifach, as men am Füürobe so lang muess warten uff e Bier. Fasnachtsarbet wird eifach immer no zweeni wärtgschetzt. 

Kommentare (0)