News

Gässle an der Moldau

Do gits d Bilder => in voller Ufflösig 

Am letschte Wuchenänd het der Stamm vo den Alte Stainlemer ame ganz bsundere Aalass dörfe derby sy. Über 40 Tamboure, Pfyffer und Vorträbler sind am letschte Samschtig in die tschechischi Haupstadt graist, zum an der Prager Fasnacht mitzmache.

Zums grad vorewägg znää, dä Aalass isch aigentlig mehr e Gedänggfyyr als e Fasnacht. Gfyrt wird die sogenanni «Samtigi Revolution», gmaint isch der Syschtemwäggsel vom Sozialismus zur Demokratie, wo am 17. Novämber 1989 mit Demos und Studänteprotäscht aagfange het und im Dezämber vom glyche Joor mit der Wahl vom Václav Havel isch abgschlosse gsii.

Die tschechischi Theaterwüsseschaftlere, d Olga Cieslarová het 2011 als Tourischtin d Basler Fasnacht miterläbbt und isch derart begaischteret gsii, dass sy beschlosse het, d Fasnacht noch Prag z bringe. Und so ischs koo, dass syt 2012 jedes Joor am 17. Novämber in Prag tüchtig pfiffe, drummlet und gässlet wird.

Beraits am Samschtig gegen Obe isch so richtig Fasnachtsstimmig ufkoo. Die verschiidene Formatione sind «Tambour Battant», wies so schön haisst, zum Kampus Hybernskà, s Zentrum für Kultur vo der Karls- Universität, gässlet, wo mir uns mit den andere Gruppe droffe hänn. Noch ere wyttere Rundi gässle  hänn sich denn alli Gruppierige vor em Karlstor zum e Monschterzug in Richtig Kampapark zämmegschlosse.

Cortège am Sunntig 

Am Sunntig am spötere Nomidaag hänn sich denn wider alli im Kampapark droffe und bevors uff e Cortège in d Altsstadt gangen isch, het sich jedi Gruppe mit ere glaine Darbietig präsentiert. Mit derby Schuelklasse, Studäntegruppe, e spektakuläri Drummelgruppe uss Belgie und vier Gruppierige uss Basel.

Aber au näbe däne offizielle Momänt hän mir vyl vo der tschechische Hauptstadt mtbykoo. Eso hän mir z.B. am Samschtig e spannendi Fiehrig dur d Prager Burg, aini vo de gröschte Burgalage in Europa, dörfe erläbe. Jewyls am Morge isch vyl Zyt zur Verfiegig gschtande, wo je noch däm isch gnutzt worde für Erkundigstoure dur d Stadt oder fürs Verdaue vo Bier und Absinth… und der Mäntig Nomidaag hän mir mit ere Schifffahrt uff der Moldau lo ussklinge.