Worum grad der Glopfgaischt?

News	zur Übersicht

Sa 07.02.2026 10:29

D Gschicht vomene Fasnachtsmarsch - mit Bilder vo der Drummeli Hauptprob

=> Fottene in hocher Ufflösig gits do

Worum mir das Joor mit em Jeisi Migger synere Gugge zämme am Drummeli ufdrätte, isch jo glar. Aber worum d Marschwaal grad uf e "Glopfgaischt" gfallen isch, brucht villicht non en Erglärig.

Föön mer doch bim Namme vo däm Marsch aa. Im Joor 1929 hets im zwaite Stogg vom Hus Utegass 47 gaischteret. Im Kinderzimmer hets an ere Wand glopft, ganz bsunders wenn der 10-jeerig Marcel im Zimmer gsi isch. Das Phänomen isch vo der Bolizei, vo Ärzt, Physiker und Spiritischte gründlig untersuecht worde, aber niemets het en Erglärig für das Phänomen gfunde. Schliesslig isch d Woonig vom Baudepartemänt grumt worde. Sy isch dernoo – trotz der Woonigsnot sällmol – drei Monet läärgstande. Dernoo isch der Spuk verschwunde gsi.

S isch kai Wunder, ass die Gaischtergschicht in ganz Basel für Ufregig gsorgt het. Und au kai Wunder isch es, ass dä Glopfgaischt an der Fasnacht 1930 zem maischtusgspiilte Sujet worden isch.

Ai Joor spöter hän die Alte Stainlemer am Drummeli e neue Marsch urufgfiert: Der "Glopfgaischt". Als Komponischt wird der Karl Schell gnennt. Und dodermit wär aigedlig alles gsait, gäbs in der Huszytig "Dr Stainlemer" vo 1931 nit die folgendi Passage zue däm Drummeliufdritt:

Der Initiant zur Schöpfung […], Pfeiferchef Emil Jeisi, gab sich, in Verbindung mit Herrn Musikdirektor Schell, der den Marsch für Piccolo in Noten setzte, alle Mühe, den "Klopfgaischt" zu Stande zu bringen. Das Mitglied René Schmassmann half redlich mit, die Pfeifergruppe mit dem neuen Marsche recht vertraut zu machen.

Der Karl Schell wird do nit als Komponischt erwäänt, är het d Melodie "in Note gsetzt". Datsächlig het der Schell, wo aigedlig Organischt und Kirchemusiker gsi isch, vorhär nie e Marsch komponiert, aber seer vyl Märsch dreistimmig gsetzt und arrangiert, eso 1912 die Alte, der Morgestraich, der Arabi oder 1926 d Feschtspiil. Het also der Migger Jeisi nit numme d Idee zue däm Marsch gha, sondern au zer Melodie?

Der erwäänt René Schmassma isch nit nummen em Migger Jeisi sy Fründ gsi. Nai, är het au in der Swingkapälle "Lanigiro" (= "Original" vo hind gläse) mitgmacht. Wemme jetze no waiss, ass Mitgliider vo der "Lanigiro", drunter au der Schmassma, Dail vo der Jeisi Migger-Gugge gsi isch, no könne mer ys lycht vorstelle, wohär d Glopfgaischt-Melodie kunnt. Do druf wyst au e Drumelikritik hi, wo in ere Zytig vo 1931 erschiinen isch:

Ueber das neue Produkt kann es nur eine Meinung geben: es ist nett, aber stellenweise zu verjazzt, zu versynkopisiert, besonders in der Melodie.
Erfindet e der Kirchemusiker Schell, wo suscht gaischtligi Lieder und patriotischi Blosmusikmärsch komponiert het, plötzlig e jazzige Fasnachtsmarsch?

E Wort mien mer au no übere Komponischt vom Drummeltäggscht verliere: Das isch der Paul "Bolle" Läder gsi, ain vo de ganz grosse Drummelinstruggder vo den Alte Stainlemer. Als Jugedlige het der

"Bolle" in der "Beppi-Clique" mitgmacht (nit z verwäggsle mit de hütige Basler Bebbi). Und wär het in sällere Glygge mitpfiffe? Richtig! Der Migger Jeisi!