Herbschtbummel 2026 Stamm und Alti Garde

News	zur Übersicht

Herbschtbummel 2026 Stamm und Alti Garde

So 13.09.2026 16:34

Mittelalter und modärni Kunscht

Do gits d => Fotteli in voller Ufflösig

Kurz nach Sunneufgang, am 12.9. hän sich je 15 Persoone vom Stamm und dr Alte Garde in dr Schalterhalle vom Bahnhof droffe…odr halt, numme 29…Aine suecht no dr Bahnhof…..

Guet ydeggt mit frischem Quöllwasser hän mir uns denn uf d Faart nach Büsserach gmacht, wo mir denn nach eme kurze Marsch am Ygang zem schtaile Uffschtiig zem Schloss Neu-Thierstein dr Nico Piazzalonga droffe hän.
Dr Nicco isch dä Expärt, wenns um das Schloss goot (aber au sunscht was s Mittelater in unserer Region so aagoot)
Uf em Wäg zem Schloss het är uns an verschiidene Plätz interessanti, historischi Informatione gä.

Vermuetlig isch friener emool scho e Schloss wytter unte gschtande, das isch aber ewäg, dorum schtoot dört s Schild: Schlossweg.

Scho gly sin mir uf em Schloss Thierstein aako. Mir hän denn gly gsee, wie sich das Schloss mit dr Zyt veränderet het. Ursprünglig im Gotische Schtiil baut, isch dr neui Aabau bim Renoviere in neubetonischem Schtiil baut worde.
Ych verzicht uf alli genaue und absolut interessante Informatione, wo uns dr Nico verzellt het. Erschtens kan ych das gar nit alles rekapituliere und zwaitens ka me das alles in sym Buech «Der Vesten Tirstein» noochelääse…kan ych nume empfääle.

In dr Ritterschtuube sin denn e paar Koschtproobe vo Met serviert worde, das isch e Honigwy, wo übrigens dr Nicco au sälber härschtellt.

Im Aaschluss het me no e bitz die prächtig Ussicht vo dr Terrasse us gnosse und mir sin denn z Büsserach im Rest Truube go Zmittag ässe.
Gä hets: Zer Vorschpys en Art Terrine in ere Gallere, gfillt mit Wurscht- und Gmiessdaili, verziert mit eme Schtüggli Peterli und e bitz Meerrättigschuum.
Drnoo e glaine gmischte Salat mit französischer Sosse, e Tomateschnitzli und Gwürzdekoration (vermuetlig Peterli und Schnittlauch, fyn ghaggt)
Zem Hauptang: Schmali Nüüdeli mit ghaggte Peterlideko, 2 Schwynsschnitzeli an ere Champignonrahmsosse, Böönli im Schpäggmantel, e Rösli Broccoli us biologischem Aabau, 2 farbe Riebli, gäl und orange. Zer Deko au no bitz Rahm us eme Kisagblööser.
Als Dessert hets Mousse au Chocolat gä mit glaine Schoggischtüggli serviert in ere Glasschale und ebefalls e Rahmdekoration us em glyche Kisagblööser.
Denn het me könne zwüsche Kaffi und Espresso wääle.

Nach däm feine Ässe hän mir uns mit em Bus uf e Wäg nach Laufe gmacht…nit z verwäggsle mit Laufe nach Buus…

Dört sin mir durch d Fusion Factory gfiert worde. Beschryybe kann ich die Usschtellig nit guet, me muess das aaluege. Sogar dr Kinschtler, dr David Pflugi isch persönlig dört gsii und het uns syni Kunschtwärgg erklärt. Es syge schynts scho Verhandlyge im Gang wäg ere Latärne….aber das isch no unbeschtätigt.
Nach däre interessante Besichtigung hän mir denn dr Haimwäg adrätte und die Maischte sin denn no in dr Märthalle, genau bim Bier Revier, no e Schlubä…oder au 2 oder 3 go nää.
So isch e sauglatte Bummel mit ere ganz tolle Schtimmig z Änd gange.
Ych möcht do no de Organisatore, em Raphi Sulzer und em Kasi Zingg härzlig dangge und natürlig au em Nicco Piazzalonga für die super Fieryg.
Au entschuldigen ych mii bi unsere Baseldütschexpärte und sunschtige Korrektöre für Rächtschryb- und Orthographiefääler

Autor: Täggscht: Jübu Fotteli: Rämsi

Bild 1 / 45

News

Herbschtbummel 2026 Stamm und Alti Garde