News |
zur Übersicht |
Mir druure um unsere Eerepreesi Fille Lehr (1931–2021) Mitti 1970-er Joor hänn e Hampfle Jungi Stainlemer am Fasnachtsdonnschdigdemoorge zuegluegt, wie der Stammverain vor der Merkur-Stube, em legendäre Stammlokal vo der Glygge, d Ladärne verabschiidet het. Wo der letscht Doon verklungen und d Ladäddere dunggle gsi isch, sinn d Stainlemer in d Baiz yne. Die Jungen aber sinn dusse stoo bliibe. S isch sällmol no d Zyt gsi, wo men e Stammverainler nodürlig “per Sii” agredet het. Do het sichs nit ghört, ass Jungi aifach zem Stamm anegsässe sinn. S sinn fascht scho alli Stainlemer in der Baiz verschwunde gsi, wo der Fille Lehr uff die Junge zuekunnt und sait: “Kömmed mit yne, iir sind doch au Stainlemer”. Und kuum sinn sy gsässe, hett ene der Fille e Gleesli gsprützte Wysse brocht und mit ene aagstosse. Eso isch er gsi, der Fille: spontan, grosshärzig, aapaggend, charismatisch, e Macher mit eme scharfe Bligg fürs Ganzi. Schwyzer Mäischter us em Neubad Uffgwaggse isch der Felix Lehr an der Wanderstross im Grossbasel. Drummle glert het er bi den Alte Stainlemer, und wie! Er hett nit nummen in den Intärne butzt, nai am Aidgnössische Damburefescht 1950 z Bärn hett er in däre Dreiergrubbe mitgruesst, wo gwunne het und dermit Schwyzer Maischter worden isch. Vier Joor spöter z Basel hetts dernoo noon e Silbermedallie gä. D Liebi füert ins Glaibasel Im Umkrais vo den Alte Stainlemer hett der Fille au d Alice “Hummi” von Arx kennen und liebe gleert, die hübschi Dochter vom ehemolige Stainepresidänt Ruedi von Arx. Der Ruedi het im ene schöne Hus an der Schwarzwaldallee gwoont. Das Hus isch dernoo für Joorzäänt s Domizil vo der Familie Lehr-von Arx worde. Will der Fille alles, won er aapaggt het, intensyv uusgläbbt het, isch er vom Grossbasler Bueb Felix zem ygflaischt “Bruefsglaibasler” Fille worde, wo der Leu danzt het und spöter Spilchef vo de drei E. worden isch.Weniger bekannt isch em Fille sy Liebi zue de Motore gsi. Mit sym Oldtimer Porsche het er e baar Mol an der Rallye Basel-Paris dailgnoo. Ins Schwärmen isch er grote, wenn er als verzellt het, wien er in junge Joor bi Döff-Speedway-Renne z Ängland mitgfaaren isch. Und näben alle däne Aktivideete het er au no en aigeni Firma uffbaut, d Pentol. Us dr Clique-Finanzkrise use Doch zrugg zue den Alte Stainlemer. Die hän bald gsee, wie dä jung Fille für d Fasnacht und d Glygge brennt. So isch er beraits 1955 zem 2. Aktuar, spöter zem Vizepresidänt gwäält worde. Sy grossi Zyt isch aber mit der Waal zem Presidänt 1962 koo. D Glygge isch sällmol noon em 50 Joor-Jubiläum, wo grossartig gfyrt worden isch, finanziell uff em Rumpf gsi. Under der Laitig vom Fille isch sy zue neuem Glanz koo. Am Änd vo synere 14-jöörigen Amtszyt, hänn d Stainlemer e Vermööge in säggsstelliger Höchi gha. Em Fille sy Vermächtnis Die gröschti Laischtig vom Fille, jä sy aigedlig Vermächtnis, isch aber der Glyggekäller am Aubärg. Wos Staineschuelhus 1968 abgrisse worden isch, zem em neue Theater Blatz z mache, hänn die Alte Stainlemer iire gmietlig Käller und d Iebigsrüm in de Schuelzimmer verlore. Dr legendäri Säbel vom Fille “Hie Staineboode“, het der Fille am ene Fasnachtsdonnschdig au emol in der Merkurstube gruefe und sy (ächte!) Säbel, wo er sälbetsmol zem Sujet bassend derby gha het, in Parkettbode vo der Baiz grammt. Dankbarkeit und Truur Mit em Fille Lehr verliere die Alte Stainlemer nit nummen iiren Eerepresidänt, sy verliere au e prägendi Figur, e Stainlemer ”de pur sang”, e ganz e grossi Figur vo der Glyggegschicht. Unser härzlig und dief Bylaid spräche mir synere Frau, der Hummi, syne baide Kinder, em Andy und der Jaqueline, und alle syne Aghörigen uus. Mir wärde immer mit grosser Danggbarkait an Fille Lehr dängge. Er wird für immer e lebändige Dail vo den Alte Stainlemer blybe.--- D Abdankigsfyyr findet am 11.11.2021 am Nomitag am Drey im "Refektorium Kleines Klingenthal" statt. |
|
Autor: Christian Zingg | |
Kommentare (0) |
|
Neuer Kommentar
Realisation: apload GmbH - Design: A. Stulz