News

zur Übersicht

125 Joor Gsellschaft zum Breo – oder Männer mit luschtige Hüet dräffe Männer mit luschtige Hüet

So 23.09.2018 19:46
 

Am letschte Samschtig het d Studänteverbindig Zofingia s 125 Joor Jubiläum vo der Gsellschaft zum Breo könne fyyre.

 

Dass Stainlemer und d Zofingia e Verainsfründschaft pflääge isch e Tradizioon, wo übrigens au scho bald 100 Joor alt isch. Der erscht Zofingeralass, wo d Staine het dörfe mitwirgge isch im Joor 1920 gsii und zwor am Heinrich Kommers (Zentralhairi).

 

Im Jooresbricht vo 1920 isch folgendes z lääse gsii: Am 3. Juli marschierten unsere Tambouren und Pfeifer an der Spitze des Heinrich  Commersfestzuges der Zofingia. Die dabei stattgefundene aus- und inwendige Befeuchtung liess nichts zu wünschen übrig (Quelle: Stainechronik uss em Joor 1987).

 

Aber kömme mer zrugg in d Gegewart. Es isch e klains Hüffeli gsii, wo sich am letschte Samschtig in der Haseburg droffe het. Grad emoll acht Pfyffer und Vier Tamboure hänn sich an däm schöne  Spootsummeroobe d Zytt gnoo, in d Stadt z pilgere. Noch zwai- drei Bierli zum Warmlaufe simmer denn durs Imbergässli uffe an Nodlebärg, wo mer ys berait gmacht hänn für das Ständeli. Obs guet tönt het, mag ych nit beurtaile, den Altherre vo der Zofingia het uff alli Fäll gfalle und sy hänn ys denn au uff ene Bierli und öppis vom Grill ins Breo bätte, was mer nadürlig fascht nit hänn könne ablääne...

 

Der Zofingia nomoll e ganz grosses Danggschön für dä härzligi Empfang und für d Bewirtig, mer kömme gärn wider für euch ko Pfyffe, sygs am Conzärtli, am nöggschte Zentralhairi oder zur 100 Joor fyyr vo unserer Fründschaft im Joor 2020.

Autor: Rämsi

Kommentare (0)

Neuer Kommentar

Name *
E-Mail (sichtbar)
Homepage (sichtbar)
Kommentare *
Sicherheitscode *
 

Realisation: apload GmbH - Design: A. Stulz