News |
zur Übersicht |
![]() |
|
"Und d Fründschaft, die wird treu bewahrt..." Dr Brief vom Preesi an d Stainlemer nach em Bundesrots-Entschäid vom 28.10.2020 Liebi Stainlemer, s'Verainslääbe im Zaiche vom Käfer 19; oder ’trotz Distanz d’Nööchi nit verliere’!! "Humor und Witz isch uns Prinzip, und das verdirbt ys kaine." Grad im Aaschluss an die hyttigi Bundesroots-Sitzig het sich au d’Swiss National Staine Task Force, besser bekannt unter em Name 'Vorstand vom Staine-Stamm‘, zunere usserordentligge (Online-) Sitzig droffe.
"Prinz Karneval isch unsere Gott, wo niemools uns versingge loot." Aber 1: Trotz däm schwere Entschaid, sin mir absolut überzügt, dass unsere Verain, speziell au in dr jetzige Situation, meh darstellt, als e raini Beluschtigungsgsellschaft am Fryttigzobe; vyle Lüt au e Rückhalt bietet. So isch es unser Ziel, für unseri Mitglider, vom klainschte Binggis bis zum routiniertischte Altgardischt, do zsy und zumindescht e klaini Flamme von unserem Verainslääbe uffrächtzerhalte, während anderi velicht scho lang alli Liechter lösche. Sich entsprächendi Lösige für die sich ständig ändernde Gegäbehaite züberlege - definitiv e Herusforderig, wo nit immer aifach und amme sogar biz frustrierend ka syy... "Drumm immer luschtig und fidel, das git e goldig reini Seel." Aber 2:
E Fasnacht und Verainslääbe unter em Vorzaiche vom Nütwüsse eröffnet ys aber au Chance. So het unseri Sujetkommission zwor au d’Fasnachtssitzig im Novämber vorerscht uf unbestimmti Zyt miese verschiebe, doch in de letschte Monet e us minere Sicht genials Sujet usgarbeitet, wo ys mit nur wenige Wuche intensiver Vorberaitig, e geniali (anderi) Fasnacht würd ermögliche. Genau s’Glyyche zellt au fürs Drummeli, wo wie d’Fasnachtsvorberaitige au nur Sinn macht, wenn mir meh Gwüsshait hän (und meh als 50 Lüt könnte ins Kiechli ko;-)).
"Drum vorwärts wyttergfaare - Hoch! läbe d Fasnachtsnarre!" Ussbligg:
Dr Vorstand drifft sich scho glyy widr und wird au euch uf em Laufende halte. Bis dört aane aber no e klaine Appäll an euch alli: "Mir pfläge ächti Baslerart, und d Frindschaft, die wird treu bewaart." Und zletscht no das:
An alli Stainlemer, wo mir scho lang nüm gseh, siggs will si sich sälber, ihri Liebschte oder Lüt in ihrem private und/oder gschäftligge Umfäld wän oder mien schütze:
An euch und allí andere au: Blyybet gsund, hebet d’Ohre styff und gänd Bschaid, wenn d’Staine irgendwie hälfe ka! E liebe Stainegruess und dangge fyr euri Kenntnisnahm,
|
|
Autor: Roman Meier | |
|
|
|
|
Neuer Kommentar
Realisation: apload GmbH - Design: A. Stulz