News

zur Übersicht

Die erschti Stainlemer Knobelwältmaischterschaft

So 20.06.2021 15:22
 

E neue Stärn am Staine-Sport-Himmel

Der Bricht und d Ranglischte: Winti

Fottene und Video: Rämsi 

Übrigens - D Fottene in optimaler Qualität kasch au do aluege =>  Knobel WM 

 

1. Gnoobel-WM: E neue Stärn am Staine-Sport-Himmel!

Liebi Stainlemer
Historischs het sich am Samschtig, 19. Juni 2021, abgspiilt. D Gnoobelgmeinschaft het sich uffgmacht, e professionelle Wäg yyzschloo und dr Wält dr Meischter z zeige.
34 Topspiiler us allne Altersklasse hänn sich am Nomidaag an siibe verschiidene Spiilort zwüsche Noodlebärg und Spaaledoor yygfunde, zum dr WM-Titel usszgnooble. 170 Fingerknöödli sinn professionell uffgwermt pünggtlig 14:00 uff e Tisch knallt. D Poschtescheff hänn wie bim Schwinge jedem e Note gä. Die, wo vorzyttig use sinn, hänn e 9.75 griegt. Dr Verlierer e 8.5 und dr Siiger vom letschte Duell isch mit eme 10i beloont worde. Nach jedere Rundi het me dr Standort gwäggslet, as me mögligscht vill Gspäänli seht. So het me näbscht em Spiil au moll wider e paar Wort minand könne reede und zämmen aastoosse. Nach siibe Rundene, zahlryche Spaziergängli und etlige Bier isch es denn 17:30 sowyt gsi und alli sinn bim Täll zämmeko. Dört het me sich mit ere Frigatelle könne stergge und s Kampfgricht het sich zruggzooge.
Acht Spiiler sinn für die finaali Phase ussgmarcht worde. Im e Eins gegen Eins het me sich miesse duresetze, zum en eedle Platz am Tisch vo de letschte Vier z ergattere. Zur Freud vo dr ganze Truppe hänn sich dört widerum Verdrätter us allne Kategorie yygfunde. Dr Stamm het dr Sandro Vecchi gstellt, die Alt Garde isch vom Steffi Bachmaa und em Beat Ärnscht verdrätte worde und die Junge hänn dr Livio Schmid gschiggt. Unter de stränge Bligg vom Oberleerer Winteregg ischs jetz um d Wurscht gange. Jedi Rundi het e Verlierer brocht, wo het miessen ussstyyge. Als Erschte hets dr Sandro verwütscht. Dr Steffi isch dr neggscht gsi, wo het miesse passe. So ischs am Schluss zum legendärschte vo allnen Änd ko: Alt gege Jung, gross gege klei, routiniert gegen unerfaare, Darth Pipsi gege Livio Skyschmid!
Basel isch nid Hollywood, e Gnoobelholz isch kei Liechtschwärt und dr Tisch vor em Täll kei Ruumschiff. So isch das halt. Dr Livio hets sich wagger gschlaage. Die luttstarggi Unterstützig isch em sicher gsi. Aber ghulfe het sy am Schluss denn halt nid. Dr Beat het die Holz sicher uff e Tisch broocht und mit synen Aasaagen überzügt. So hämmer en zum erschte Gnoobelwältmeischter küürt. Härzligi Gratulation!

Y bi mr sicher, as dä Aaloss au in Zuekunft für vill Freud sorge wird. Und eins isch klar: Die Junge kömme! Wär mit däne Livios, Felix, Leos am Tisch sitzt zum Gnooble, muess sich warm aaleege. In däm Sinn: Die Macht sei mit euch!

Bricht: Winti

 

Autor: Philipp Ramseier
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33
Bild 1 / 33

Kommentare (3)

Thomi (Pf) Schmid - 20.06.2021 17:57
E grossartige Nomidaag gsi! Härzlige Dangg an alli vom OK. So mien mir wytterfaare. ??
Thomi (Pf) Schmid - 20.06.2021 20:18
Keini Froogezeiche! (Tipp- oder Übermittligsfääler?) So isch es! ;-)
Sandro Vecchi - 21.06.2021 14:03
Dangge and Organisatoore!! Het sehr viel Spass gmacht!!

Neuer Kommentar

Name *
E-Mail (sichtbar)
Homepage (sichtbar)
Kommentare *
Sicherheitscode *

Realisation: apload GmbH - Design: A. Stulz