News

Once upon a time in dr Freie Strooss

Eini vo minen erschten Erinnerigen an die Alte Stainlemer isch jetz denn öppe 40 Joor alt. Dr Bappe het my am Bummelsunntig mit in d Stadt gno. Für mi ischs scho langsam spoot worde und do het er gmeint, as das genau dr richtig Zytpunggt isch, zum non e letschts, guets Ohrvoll Fasnachtsmusig mitznää. In dr Freie hets scho lang keini Mensche me gha und so han y eigentlig nid begriffe, wieso as mir do no blöd umestöön. Irgendwenn het denn au dr Bappe gmeint, as die kaibe Cliquen alwä scho durab isch und mr sinn Richtig Banggverein loszottlet. Aber denn hämmers plötzlig ghört rusche. Und das Rusche isch schnäll lütter worde. Gseh hämmer no nüt. Wo die Erschten ummen Egge ko sinn, hets in mine 5- vellicht 6-jährigen Ohren numme no knallt. Und das het Spure hinterloo...

Szenewäggsel: Samschtig, 4. Septämber 2021, 16:15, Gifthüttli. Guet gluunt und wider einigermasse regeneriert von ere luschtige GV, hogg y mit ere Handvoll Stainlemer bim Bier. Dr Generalstab het ys im Ruum Schnydergass stationiert und so hämmer gwunderig gwartet, was do uff ys zuekunnt. Und denn isch das Rusche plötzlig wider in mym Ohr... 

Als Staine-Tambour beweggt me sich eigentlig immer im Aug vom Tornado. Me wagglet in ruehigem Schritt, tranceähnlig, krällelet oder bolzt uff em Fäll zu de Piccolodöön und griegt eigentlig nie so genau mit, in was für ere mächtige Gwalt mir unterwägs sinn. Aber geschter isch das ganz anderscht gsi. Wider so, wie in dr Freie. Mr sinn uffgstande, hänn dr letschti Schlugg versorgt und eifach gluegt. Gseit worden isch nümme vill. Und wo die Bandi denn bi uns aakoo isch, het sy uns quasi wirbelsturmartig verschlunge. Plötzlig bin y an mym Platz gstande, zrugg im Aug vom Tornado, zrugg im Stainsbeebe! 

In dr Gifthütte hämmer Halt gmacht. Dr Marc het mr versuecht z erklääre, wien y gluegt ha, won y yygstande bi. Das het mr düütlig gmacht, was do wohrschyns bi allne passiert isch. So vill glüggligi Gsichter han y scho lang nümm gseh. Ganz jungi, ganz alti und au sottigi, wo mr scho lang nümm gseh hänn. Es isch definitiv klar worde, as das e gewaltige Daag isch. Mit däm Gfühl im Ruggsagg simmer denn nomoll yygstande und hänn ys uf e Wäg an d Wurschtsalatfront gmacht. 

Kommentare (693)