Staine Dart Open 2025 – E Turnier im Waggstum - News - News

News	zur Übersicht

Staine Dart Open 2025 – E Turnier im Waggstum

Sa 12.04.2025 10:43

Frytig, 11. April 2025 – Aubärg Palace Basel

In dr Wält goots drunter und drüber. Dr Presidänt vo dr PSDC het Stroofzöll vo 145% uf d Mitgliiderbydrääg aadroot und d Härstellig, dr Vertriib und Konsum vo Chili con Carne uff e Stainekäller beschränggt. Das het natürlig Folge gha. D Teilnäämerzaale sinn explosionsartig aagstiige. 26 aggtivi Darter sinn im Käller brav uff s Bänggli ghoggt, wo dr Stefald Tregg letschti Droogebärde vo sich gä und die neue Turniertarif duregää het. Verstande het en keine. Dorum do nomoll die exaggten Ussfierigen in Schriftgröösi 8 uff 368 Sytte.

Am Aafang isch er no lieb gsi und het die neue Stainedarter Willkomme gheisse: Fredy «The angry Coach» Chiaradia, Luis «Lucky Luke Junior» Egger, Pätty «Lucky Luke» Egger, Robin «The Jumpion» Helfenstein, Luc «The Builder» Musy, Dominique «Hellboy» Olah, Philipp «Silverback» Ramseier , Raban «The Raven» Roth und dr Etienne «hoolt s» Moos«vo de Dächer»brugger. 9 Neuzuegäng! So Zaale simmer ys bi dr Staine leider nümm so gwoont.

Dr Hot Shot Dominik, Beat Duume Ernst, Snowflake Luki Flück, Heinz Tells Geschoss, Mardi Gras Joel, Philippe The Moosician, Mülli The Stringman, Enrico The Pain from Spain, Thomi The Piper, Thomi The Incomparable, Bullseye Sulz Raphi, Raphi The Phantom, Ben The V-Man, Phil The Kill, Hoppy Bullet Kasi, René The Hammer Müller und Slapshot Winti hänn d Szene komplett gmacht.

Dr Läbi het e Kuchihälferstei miessen aastelle, zum die Unmänge an brunrötligem Gold könne z verteile. Scho zmitts em Ässen isch mr s erschte Fürzli ab. D Schwyzer Armee könnt uns an Droone umefliegen und irgendwo abwärfe. Das Land wär denn unbewoonbar für die neggschte 200 Joor. Härzlige Dangg an däre Stell, liebe Läbi!

Wider zrugg zum Sport. Vor dr erschte Partie het e Jede miesse 9 Pfyyl wärfen, alles zämmerächnen und in sy Dienschtbiechli yydraage. Nach dr Vorrundi, wo alli mehr oder weniger 3-4 Spiil absolviert hänn, het denn dr Kreiskommandant die feschten Zueteilige vorgnoo. Alli, won e Kranz gschoose hänn (Platz 1-7), hänn e Züüghüüsler als Partner griegt (Platz 14-20). Die mit em Richtabzeiche (Platz 8-13) hänn die Verseerte (Platz 21-26) miesse zum Platz begleite. So isch es zu folgende Duel ko:

Achtelfinal

Enrico/Kasi – Luis/Pätty
Heinz/Raphi Sulzer – Fredy/Rämsi
Robin/Raban – Mülli/Pfyffer-Thomi
Philippe Veyre/Dominique – Ben/Philippe Moosbrugger

Etienne/Winti – Luki/Bibsi

Für d Viertelfinääl hänn die folgende Duos gwartet:
Joel/Drummel-Thomi – Etienne/Winti
René/Raphi Vecchi – Ben/Philippe Moosbrugger
Niggidom/Luc – Mülli/Pfyffer-Thomi

Enrico/Kasi – Heinz/Raphi Sulzer

Halbfinal
Joel/Drummel-Thomi – Enrico/Kasi

René/Raphi Vecchi – Niggidom/Luc

Final
Joel/Drummel-Thomi – René/Raphi Vecchi
Siiger 2025

Joel/Drummel-Thomi – Gratuflation seit me nach däm Znacht!

Y ha Freud, as es immer no Zuelauf git und immer wider neui Darter drzuestoosse. Woorschyynlig mache mr gly d GV drnoo, will denn mehr aawääsend sinn. Wenn d Källerquarantäänezyt ummen und alles desinfisziert isch, gib y de Prager Bscheid, as sy mit em grosse Horn können Entwarnig bloose (ein einminütiger Dauerton). Dr Bieralarm wird am Mittwuch, 16. April, 13:30, teschtet (zwölf tiefe Dauertöne von je 20 Sekunden in Abständen von je 10 Sekunden).
Sind friidlig! Es isch nur e Spiil.

Autor: Text: Winti Bider: Rämsi